එංගලන්තය පැරදවූ පසු ආර්ජන්ටිනාව පිටිය මැද එසවූ බැනරයේ තිබ්බේ මොනවද?

ෆිෆා (FIFA) ලෝක කුසලාන පාපන්දු තරගාවලියේ තියුණු මුහුණුවරක් ගත් අවසන් පූර්ව තරගයෙන් එංගලන්තය 2-1ක් ලෙස පරාජය කරමින් ආර්ජන්ටිනාව අවසන් මහා තරගයට සුදුසුකම් ලැබීමට සමත් වුණා. කෙසේ වෙතත්, තරග ජයග්‍රහණයෙන් පසු ආර්ජන්ටිනා ක්‍රීඩකයින් සිදුකළ ප්‍රකාශයක් හේතුවෙන් ඔවුන් මේ වන විට දැඩි අර්බුදයකට මුහුණ දී සිටියා. තරගය පැවැති ‘මර්සිඩීස් බෙන්ස් ඇරීනා’ (Mercedes Benz Arena) ක්‍රීඩාංගණය මැදට පැමිණි ආර්ජන්ටිනා ක්‍රීඩකයන් වන ජියෝවානි ලෝ සෙල්සෝ (Giovani Lo Celso) සහ නිකොලස් ඔටමෙන්ඩි (Nicolas Otamendi) “Las Malvinas son Argentinas” (ෆෝක්ලන්ත දූපත් ආර්ජන්ටිනාවට අයිතියි) යනුවෙන් සඳහන් බැනරයක් ප්‍රදර්ශනය කර තිබුණා. මෙම බැනරය හරහා ඔවුන් අදහස් කර ඇත්තේ එංගලන්තය සහ ආර්ජන්ටිනාව අතර වසර 44කට පෙර (1982 දී) දින 74ක් පුරා පැවැති දරුණු යුද්ධයට හේතු වූ ෆෝක්ලන්ත දූපත් (ආර්ජන්ටිනාවේ මෙය හඳුන්වන්නේ ‘ඉස්ලාස් මැල්විනාස්’ යනුවෙන්) ගැටලුවයි. එම යුද්ධයෙන් ආර්ජන්ටිනා වැසියන් 649 දෙනෙකු සහ බ්‍රිතාන්‍ය ජාතිකයින් 255 දෙනෙකු ඇතුළුව 900කට අධික පිරිසකට ජීවිත අහිමි වුණා. 1982 යුද්ධයෙන් පසු බ්‍රිතාන්‍යය ෆෝක්ලන්තයේ බලය යළි තහවුරු කරගත් නමුත්, ආර්ජන්ටිනාව තවමත් මෙම බ්‍රිතාන්‍ය ආරක්ෂිත ප්‍රදේශය තමන්ගේ ජාතික අනන්‍යතාවයේ අත්‍යවශ්‍ය කොටසක් ලෙස සලකනවා. තරගයේ 55 වැනි මිනිත්තුවේදී ඇන්තනි ගෝඩන් (Anthony Gordon) එංගලන්තය වෙනුවෙන් ගෝලයක් ලබා ගනිමින් ආර්ජන්ටිනාව පසුපසට ඇද දැමුවා. එහෙත් 85 වැනි මිනිත්තුවේදී ඈත සිට එල්ල කළ සුපිරි ප්‍රහාරයකින් ගෝලයක් ලබාගත් එන්සෝ ෆර්නැන්ඩස් (Enzo Fernandez) ලකුණු තත්ත්වය සම කළා. ඉන් අනතුරුව, අතිරේක කාලයේ දෙවන මිනිත්තුවේදී ලවුටාරෝ මාර්ටිනස් (Lautaro Martinez) හිසෙන් එල්ල කළ පන්දුවක් ගෝලයක් බවට පත් කරමින් ආර්ජන්ටිනාවට විශිෂ්ට ජයග්‍රහණයක් අත්කර දුන්නා. 2022 කටාර් ලෝක කුසලාන ශූරයන් වූ ලියොනල් මෙසී ඇතුළු ආර්ජන්ටිනා කණ්ඩායම සිය ශූරතාව රැකගැනීමේ අරමුණින් ලබන ඉරිදා පැවැත්වෙන අවසන් මහා තරගයේදී ස්පාඤ්ඤයට එරෙහිව තරග වැදීමට නියමිතයි. තරග පිටියේ දේශපාලන පණිවිඩ ප්‍රදර්ශනය කිරීම සම්බන්ධයෙන් වන ෆිෆා (FIFA) සංවිධානයේ දැඩි නීතිරීති උල්ලංඝනය කිරීම හේතුවෙන් මෙම බැනරය ප්‍රදර්ශනය කළ ආර්ජන්ටිනා කණ්ඩායමට විනය ක්‍රියාමාර්ගවලට මුහුණ දීමට සිදුවනු ඇතැයි වාර්තා වනවා. ‘දි ඇසෝසියේටඩ් ප්‍රෙස්’ (The Associated Press) පුවත්පතට අනුව, තරගය නැරඹීමට පැමිණෙන ආර්ජන්ටිනා ප්‍රේක්ෂකයින්ට ෆෝක්ලන්ත දූපත් නිරූපණය වන ධජ හෝ බැනර් ක්‍රීඩාංගණයට රැගෙන ඒම තහනම් කර තිබුණා.