2026 ලෝක කෘත්රිම බුද්ධි (AI) සමුළුව සහ ගෝලීය AI කළමනාකරණය පිළිබඳ උසස් පෙළේ රැස්වීම අද (17) චීනයේ ශැංහයි නුවරදී ආරම්භ වුණා. සමුළුවේ සමාරම්භක අවස්ථාව අමතමින් චීන ජනාධිපති ෂී ජින්පිං මහතා, කෘත්රිම බුද්ධිය මානව ප්රගතියට සේවය කරන, ආරක්ෂිත සහ සාධාරණ තාක්ෂණයක් ලෙස සංවර්ධනය කළ යුතු බව අවධාරණය කළා. එහිදී ඔහු ගෝලීය AI පාලනය සම්බන්ධයෙන් ප්රධාන යෝජනා හතරක් ද ඉදිරිපත් කළ අතර, විවෘත නවෝත්පාදනය, ආරක්ෂිත කළමනාකරණය, ජාත්යන්තර සහයෝගීතාව සහ පොදු අභියෝග සඳහා එක්ව විසඳුම් සෙවීම ඒ අතර ප්රධාන වුණා. චීනය AI ක්ෂේත්රයේ වගකීමෙන් කටයුතු කරන රටක් ලෙස ලෝකයට තාක්ෂණික විසඳුම් සහ පොදු ප්රතිලාභ ලබාදීමට කැපවන බව ද ෂී ජින්පිං මහතා සඳහන් කළා. මෙම සමුළුව සඳහා කසක්ස්තානය, කාම්බෝජය සහ තායිලන්තයේ රාජ්ය නායකයින් මෙන්ම එක්සත් ජාතීන්ගේ මහලේකම් ඇන්ටෝනියෝ ගුටරෙස් ද එක්වූ අතර, AI කළමනාකරණය සම්බන්ධයෙන් චීනය ඉදිරිපත් කළ යෝජනා පිළිබඳ සිය සහය පළ කළා. සමුළුව අවසානයේ 2026 ලෝක AI සමුළුවේ සභාපති ප්රකාශය ද නිල වශයෙන් නිකුත් කෙරුණා.
