බොලිවුඩ් නළු ටයිගර් ෂ්රෝෆ් ගමන් කළ රථයට ඉන්දියාවේ මුම්බායි නුවරදී වෙඩි ප්‍රහාරයක් එල්ල වී තිබෙනවා. විදෙස් මාධ්‍ය වාර්තා කළේ, ඊයේ (18) මුම්බායි නුවර ජුහු ප්‍රදේශයේදී මෙම වෙඩි තැබීම සිදුව ඇති බවයි. ටයිගර් ශ්‍රොෆ් පාපන්දු ක්‍රීඩාවේ නිරත වීමෙන් අනතුරුව එම ස්ථානයෙන් පිටත්ව යාමට සූදානම් වෙමින් සිටියදී, පුෂ්පා පාර්ක් ආසන්නයේදී නාඳුනන පුද්ගලයන් තිදෙනෙකු ඔහු ගමන් කළ රථයට වෙඩි තබා ඇති බව වාර්තා වනවා. එම අවස්ථාවේදී ඔහුගේ රසිකයන් පිරිසක් ද ඒ අසල රැස්ව සිට ඇති බව සඳහන් වනවා. වෙඩි ප්‍රහාරයෙන් ටයිගර් ෂ්රෝෆ්ට කිසිදු හානියක් සිදුව නොමැති අතර, ඔහුගේ රියැදුරු සහ ත්‍රිරෝද රථ රියැදුරෙකු තුවාල ලබා තිබෙනවා. තුවාල ලැබූවන් ප්‍රතිකාර සඳහා රෝහල්ගත කර ඇති බවයි වාර්තා වන්නේ. එරට නියෝජ්‍ය පොලිස් කොමසාරිස් මෝහිත් ගාර්ග් (Mohit Garg) සඳහන් කර ඇත්තේ, ජුහු පොලිස් ස්ථානයේ බල ප්‍රදේශයට අයත් ස්ථානයකදී මෙම සිද්ධිය වාර්තා වී ඇති බවත්, ඒ සම්බන්ධයෙන් විමර්ශන ආරම්භ කර ඇති බවයි. වෙඩි තැබීමෙන් අනතුරුව පලාගිය සැකකරුවන් හඳුනා ගැනීම සඳහා පොලීසිය සීසීටීවී දර්ශන පරීක්ෂා කරමින් වැඩිදුර විමර්ශන සිදු කරන බවයි වාර්තා වන්නේ.
