සංචාරක ප්රවර්ධන කාර්යාංශයට අයත් රජයේ මුදල් අවභාවිත කිරීමේ සිදුවීමකට අදාළව, හිටපු අමාත්ය බැසිල් රාජපක්ෂ මහතාව වහාම අත්අඩංගුවට ගෙන අධිකරණය හමුවට පමුණුවන ලෙස කොටුව මහේස්ත්රාත් පසන් අමරසේන මහතා අද (17) නියෝග කළා. මහේස්ත්රාත්වරයා විසින් මෙම නියෝගය නිකුත් කරනු ලැබුවේ අපරාධ පරීක්ෂණ දෙපාර්තමේන්තුවේ නීතිවිරෝධී වත්කම් විමර්ශන ඒකකය වෙතයි. මුදල් අවභාවිතයට අදාළ මෙම මහේස්ත්රාත් පරීක්ෂණය අද දින අධිකරණය ඉදිරියේ යළි සලකා බැලූ අවස්ථාවේදී මෙම නියෝගය ප්රකාශයට පත් කළා. පසුගිය 2014 වසරේදී සංචාරක ප්රවර්ධන කාර්යාංශය වෙත වෙන් කර තිබූ රුපියල් මිලියන 7.8 ක මුදලක් එම කාර්යාංශයේ ප්රවර්ධන කටයුතු සඳහා යෙදවීම වෙනුවට, ඌව පළාත් සභා මැතිවරණ ව්යාපාරය වෙනුවෙන් ටී-ෂර්ට් 12,000 ක් මිලදී ගැනීමට වැය කර තිබීම යන සිද්ධියක් සම්බන්ධයෙන් අපරාධ පරීක්ෂණ දෙපාර්තමේන්තුව විසින් මෙම නඩුව ගොනු කර තිබුණා. රජයේ මුදල් මෙලෙස වෙනත් කාර්යයකට උපයෝගී කරගනිමින් රජයට පාඩු සිදුකිරීමේ චෝදනාව මත මෙම නඩුව සිදු කරනු ලබනවා.
