(නිමල් ජයරත්න)
අලි මිනිස් ගැටුමට විසඳුම් ඉල්ලා ඇළහැර ප්රදේශයේ ගොවි සංවිධාන නවයක විශාල පිරිසක් අද දහවල් ගිරිතලයේ බකමූණ ප්රධාන මාර්ගය අත්තනකඩවල ප්රදේශයෙන් අවහිර කරමින් විරෝධතාවයක නිරත වූහ.
අත්තනකඩවල, පොකුණුගල, ඉකිරිවැව, සෑගල, ඇලහැර, කෝට්ටපිටිය, කෝඳුරුවාව, දිග්ගල්පිටිය, මඩුදමන, ඉකිරිවැව යන ගම්මානවල ගොවිසංවිධාන 09 ක ගොවිහු 300 කට ආසන්න පිරිසක් මෙම විරෝධතාවයට එක්ව සිටියහ.
ඇළහැර ප්රදේශයේ මීට පෙර වන අලි පහරදීමෙන් මිනිස් ජීවිත රැසක් විනාශ වූ අතර දේපල හානි මෙන්ම නිවාස රැසකටද වන අලි විසින් හානි කළහ.
මෙම විරෝධතාවය ඇළහැර ජනතා එකමුතුව විසින් සංවිධානය කර තිබුණි.
මෙම විරෝධතාවය හේතුවෙන් ගිරිතලේ, බකමූණ ප්රධාන මාර්ගයේ වාහන ගමනා ගමනයට පැය තුනකට ආසන්න කාලයක් බාධා එල්ල වූ අතර, දියබෙදුම පොලිස් ස්ථානාධිපති, කේ.එන්.සී. මධුසංක මහතා ඇතුළු පොලිස් නිලධාරීන් පිරිසක් විරෝධතාවය පැවැති ස්ථානයට පැමිණ විරෝධතාකරුවන්ගේ ඉල්ලීමට නිලධාරීන් ගෙන්වා දෙන බවට ලබාදුන් පොරොන්දුවක් සමඟ විරෝධතාවය එක් මංතීරුවක පමණක් ක්රියාත්මක කිරීමට ගොවීන් කටයුතු කළහ.
