(අංජුල මහික වීරරත්න)
අලි - මිනිස් ගැටුම් කළමනාකරණය සඳහා වන ජාතික ක්රියාකාරී සැලැස්ම සකස් කිරීමට කැබිනට් අනුමැතිය ලැබී ඇත.
පසුගිය කාලය තුළ ශ්රී ලංකාවේ ජනගහනයේ සිදු වූ වැඩිවීම, සංවර්ධන කටයුතු වල සිදු වූ වර්ධනය, වනාන්තර එළිපෙහෙළි කිරීම වැනි හේතු මත වන අලින්ගේ සාම්ප්රදායික සංක්රමණික මාර්ග අහිමි වීමේ සහ ඔවුන්ගේ වාසස්ථාන විනාශ වීමේ ප්රතිඵලයක් වශයෙන් ශ්රී ලංකාවේ දිස්ත්රික්ක 25 න් දිස්ත්රික්ක 19ක් තුළ සහ ප්රාදේශීය ලේකම් කොට්ඨාස 341න් 134 ක් තුළ දීර්ඝ කාලයක සිට අලි - මිනිස් ගැටුම් අඛණ්ඩ හා සීඝ්ර ලෙස වර්ධනය වීම නිරීක්ෂණය කරනු ලැබ තිබේ.
2024 වර්ෂයේදී සිදු කරන ලද වන අලි සමීක්ෂණයට අනුව මෙරට වන අලි 7,450 ක් පමණ සිටින බව ගණනය කර ඇත. අලි - මිනිස් ගැටුම් හේතුවෙන් වාර්ෂිකව මිනිස් ජිවිත සහ වන අලි මරණ සැලකිය යුතු සංඛ්යාවක් සිදු වන බව වාර්තා වී තිබේ. එසේම, වන අලින් විසින් වර්ෂයකට සිදු කරනු ලබන දේපොළ හානි දහසකට අධික සංඛ්යාවක් වාර්තා වේ. 2020 වසරේදී 'ශ්රී ලංකාවේ අලි - මිනිස් ගැටුම් අවම කිරීම සඳහා ජාතික ක්රියාකාරී සැලැස්මක් ' සකස් කර ඇති නමුත්, වර්තමාන අලි - මිනිස් ගැටුම්වල තත්ත්වය එම කාලයට සාපේක්ෂව වෙනස් වී ඇති බැවින්, ඒ සඳහා නව ජාතික ක්රියාකාරී සැලැස්මක් සකස් කිරීමේ අවශ්යතාව හඳුනාගනු ලැබ ඇත. ඒ අනුව, අලි - මිනිස් ගැටුම් කළමනාකරණය සඳහා වන නව ජාතික ක්රියාකාරී සැලැස්ම කෙටුම්පත් කිරීම පිණිස අවශ්ය පියවර ගැනීම සඳහා පරිසර අමාත්යවරයා ඉදිරිපත් කළ යෝජනාව අමාත්ය මණ්ඩලය විසින් අනුමත කරන ලදී.
