එල් නිනෝ තත්ත්වයේ බලපෑම් ලොව පුරා දැනෙන්නට පටන් ගැනීමත් සමඟ ලෝකය දරුණු කාලගුණික තත්ත්වයන් සහිත අනතුරුදායක කලාපයකට ඇතුළු වී ඇති බව එක්සත් ජාතීන්ගේ මහලේකම් අන්තෝනියෝ ගුටරේස් අනතුරු අඟවා තිබෙනවා. ලෝක කාලගුණ විද්යා සංවිධානය නිකුත් කළ නවතම දත්ත අනුව වසර 70කට වැඩි කාලයකින් ඇති වන ප්රබලම එල් නිනෝ තත්ත්වයක් මෙය විය හැකි බව සඳහන්. එම තත්ත්වය අවම වශයෙන් 2027 පෙබරවාරි මාසය දක්වා පැවතිය හැකි බවද එම සංවිධානය පෙන්වා දෙනවා. එල් නිනෝ තත්ත්වය හේතුවෙන් ලොව පුරා කාලගුණ රටාවන්හි සැලකිය යුතු වෙනස්කම් ඇති විය හැකියි. ඒ අනුව ඇතැම් ප්රදේශවලට දැඩි නියඟ තත්ත්වයන් බලපාන අතර තවත් ප්රදේශවලට ප්රබල සුළි කුණාටු සහ ගංවතුර ඇතිවිය හැකි බව අනතුරු ඇඟවෙනවා. මේ අතර, මිනිස් ක්රියාකාරකම් හේතුවෙන් දැනටමත් ලෝක උෂ්ණත්වය ඉහළ යමින් පවතින බවද සඳහන්. එවැනි පසුබිමක එල් නිනෝ තත්ත්වය හේතුවෙන් ඇතැම් ප්රදේශවල උෂ්ණත්වය තවදුරටත් ඉහළ යා හැකි බව කාලගුණ අනාවැකි පළකරන්නන් පවසනවා. ගුටරේස් සඳහන් කර ඇත්තේ එල් නිනෝ තත්ත්වය මේ වනවිට දැවැන්ත පරිමාණයෙන් වර්ධනය වෙමින් පවතින බවයි. විද්යාත්මක දත්ත අනුව පෘථිවිය මීට පෙර මුහුණ නොදුන් ආකාරයේ අනතුරුදායක තත්ත්වයකට පත්ව ඇති බවද ඔහු පෙන්වා දෙනවා. සාගර ජලය තවදුරටත් උණුසුම් වෙමින් පැවතීම පිළිබඳවද ඔහු අවධානය යොමු කර තිබෙනවා. එල් නිනෝ තත්ත්වයෙන් ඇති විය හැකි බලපෑම් හේතුවෙන් මරණ, අවතැන්වීම් සහ පරිසර හානි අවම කිරීම සඳහා විවිධ රටවල් පියවර ගනිමින් සිටිනවා. ඒ යටතේ පූර්ව අනතුරු ඇඟවීමේ පද්ධති ශක්තිමත් කිරීමටද කටයුතු කර තිබෙනවා. එමෙන්ම හදිසි තත්ත්වයන් සඳහා පෙර සූදානමක් ලෙස වෛද්ය ආධාර සැපයීමටද පියවර ගෙන ඇති බව සඳහන්. කෙසේ වෙතත්, මෙම එල් නිනෝ තත්ත්වයේ පවතින දැඩි ප්රබලතාව හේතුවෙන් අවදානමට ලක්විය හැකි ජන කණ්ඩායම් සම්බන්ධයෙන් විශේෂ අවධානයක් යොමු වී තිබෙනවා. ලෝක කාලගුණ විද්යා සංවිධානය එල් නිනෝ තත්ත්වය හේතුවෙන් ඇතිවිය හැකි දරුණු කාලගුණික තත්ත්වයන් පිළිබඳ අනාවැකි ජනතාව වෙත කඩිනමින් ලබාදීම සඳහා දැවැන්ත මෙහෙයුමක් ආරම්භ කර ඇති බවද සඳහන්. එම සංවිධානයේ මහලේකම් මහාචාර්ය සෙලෙස්ටේ සවුලෝ පවසන්නේ එල් නිනෝ තත්ත්වයට ලොව පුරා ජනතාවට සහ ආර්ථිකයන්ට දැඩි බලපෑමක් එල්ල කිරීමේ හැකියාව පවතින බවයි. විශේෂයෙන් දරුණු කාලගුණික තත්ත්වයන්ට මුහුණ දීමට සිදුවිය හැකි රටවල් ඒ සඳහා කල්තියා සූදානම් වීම වැදගත් බව විශේෂඥයන් පෙන්වා දෙනවා. එල් නිනෝ තත්ත්වයත් දේශගුණික විපර්යාසත් එකිනෙක සමඟ සම්බන්ධ වන පසුබිමක ඉදිරියේදී කාලගුණික අවදානම් තවදුරටත් ඉහළ යා හැකි බවටද අනතුරු ඇඟවීම් පළව තිබෙනවා. ඒ අනුව එල් නිනෝ තත්ත්වයේ වර්ධනය පිළිබඳව ලෝක කාලගුණ විද්යා සංවිධානය ඇතුළු ජාත්යන්තර ආයතන අඛණ්ඩව නිරීක්ෂණය කරමින් සිටිනවා.
