(යොහාන් භාසුර)
ජාතික ගමනාගමන කොමිෂන් සභාවේ බලපත්රය නොමැති බස් රථ දහසකට (1,000) ආසන්න සංඛ්යාවක් දුර ගමන් සේවා මගී ප්රවාහනයේ නිරත වන බව ලංකා පෞද්ගලික බස් හිමියන්ගේ සංගමයේ සභාපති ගැමුණු විජේරත්න මහතා 'ලංකාදීප'යට පැවසීය.
මාර්ග බලපත්රය ලබාගෙන මගී ප්රවාහනයේ යෙදෙන බස් රථ වලට මෙම තත්වයෙන් විශාල හානියක් වන බව කී විජේරත්න මහතා මෙම තත්වය පොදු ප්රවාහන සේවය පාවිච්චි කරන ජනතාවගේ ආරක්ෂාවට ද විශාල ගැටලුවක් බව ද සඳහන් කළේය.
ඇතැම් මහා පරිමාණ පෞද්ගලික බස් රථ සමාගම් එකම වර්ණයේ බස් රථ යොදාගෙන මෙම නීති විරෝධී ක්රියාවේ යෙදෙන බවත් ජාතික ගමනාගමන කොමිෂන් සභාව මේ පිළිබඳව අවධානය යොමු නොකරන බවත් ගැමුණු විජේරත්න මහතා වැඩිදුරටත් සඳහන් කළේය.
ජාතික ගමනාගමන කොම්ෂන් සභාවේ සභාපති පී. ඒ. චන්ද්රපාල මහතාගෙන් මේ පිළිබඳව කළ විමසුමකදී පැවසුවේ බලපත්ර නොමැතිව ද දුර ගමන් සේවා මගේ ප්රවාහනයේ යෙදෙන බස් රථ සැලකිය යුතු ප්රමාණයක් ඇති අතර එය බස් රථ දහසක් ද යන්න නොදන්නා බවත් ඒ වගේම බලපත්ර ලබාගෙන තමන්ට වාසිදායක ගමන් වාර පමණක් ධාවනය කරන බස් රථ ද ඇති බවත්ය.
බලපත්ර නොමැතිව ධාවනය කරන බස් රථ සහ බලපත්ර ඇතිව නියමිත පරිදි ධාවනය නොකරන බස් රථ යන බස් රථ වර්ග දෙකම පිළිබඳව මේ වන විට අවධානය යොමු කර ඇති බවත් ඒ සඳහා වැඩපිළිවෙලක් සකස් කරමින් සිටින බවත් සභාපතිවරයා වැඩිදුරටත් සඳහන් කළේය.
