හිටපු ජනාධිපති ගෝඨාභය රාජපක්ෂ මහතාව අත්අඩංගුවට ගැනීම හෝ නොගැනීම තීරණය වන්නේ දේශපාලන අවශ්යතාවන් මත නොව, අපරාධ පරීක්ෂණ දෙපාර්තමේන්තුව මඟින් සිදුකරන විමර්ශනවලදී හෙළිදරව් වන කරුණු සහ සාක්ෂි අනුව පමණක් බව කැබිනට් මාධ්ය ප්රකාශක අමාත්ය නලින්ද ජයතිස්ස මහතා පවසනවා. අමාත්යවරයා සඳහන් කළේ, පාස්කු ඉරිදා බෝම්බ ප්රහාරයට හිටපු ජනාධිපතිවරයාගේ ඇති සම්බන්ධය පිළිබඳව මේ මොහොතේ රජය සතුව කරුණු නොමැති වුවද, ඉදිරි නෛතික පියවර තීරණය කිරීම සම්පූර්ණයෙන්ම අපරාධ පරීක්ෂණ දෙපාර්තමේන්තුව සතුවන කාර්යයක් බවයි. ත්රස්තවාදය වැළැක්වීමේ පනත යටතේ තමන්ව අත්අඩංගුවට ගැනීම වැළැක්වීමේ නියෝගයක් ඉල්ලා හිටපු ජනාධිපතිවරයා අභියාචනාධිකරණයට රිට් පෙත්සමක් ඉදිරිපත් කිරීම සහ ඔහු අත්අඩංගුවට ගැනීමට නියමිත බවට සමාජ මාධ්යවල පළවන වාර්තා සම්බන්ධයෙන් අද පැවැති කැබිනට් තීරණ දැනුම්දීමේ මාධ්ය හමුවේදී, මාධ්යවේදියෙකු විමසූ ප්රශ්නයකට පිළිතුරු දෙමින් අමාත්යවරයා මේ බව කියා සිටියා. හිටපු ජනාධිපතිවරයා අධිකරණය හමුවට ගොස් ඇත්තේ, “සමහරවිට හොරාට කලින් කෙහෙල්කැනට පැන්නාද දන්නෙත් නැහැ.” යනුවෙන් නලින්ද ජයතිස්ස අමාත්යවරයා එහිදී කියා සිටියා. කෙසේවෙතත් පරීක්ෂණ සහ විමර්ශන සිදුවන ආකාරය මෙන්ම කරුණු හෙළිදරව් වන ආකාරය දෙස බැලීමේදී , එම විමර්ශන නිවැරදිව ඉදිරියට ඇදෙන විට එය තමන් දෙසට පැමිණෙනු ඇතැයි ඇතැම් පාර්ශවයන් තුළ භීතියක් ඇති විය හැකි බවත්, එවැනි භීතියකින් පසුවන අය මෙලෙස කටයුතු කරන බවත් ඔහු පෙන්වාදෙනවා.
