එකම සිදුවීමට නඩු දෙකක් බෑ – බන්ධනාගාරයේ නඩු විභාගය තහනම් කරන්නැයි ඉල්ලීමක්

මීගමුව බන්ධනාගාරය තුළ සිදු වූ ගැටුමෙන් පොලිස් විශේෂ කාර්ය බලකායේ නිලධාරීන් 10 දෙනෙකු සහ රැඳවියන් 21 දෙනෙකු ඝාතනය වීමේ සිද්ධිය සම්බන්ධයෙන් බන්ධනාගාර අධිකරණය මඟින් වෙනම නඩු විභාගයක් පවත්වා දඬුවම් පැමිණවීම වැළැක්වීමේ තහනම් නියෝගයක් බන්ධනාගාර කොමසාරිස් ජනරාල්වරයා වෙත නිකුත් කරන ලෙස අපරාධ පරීක්ෂණ දෙපාර්තමේන්තුව ඊයේ (16) මීගමුව මහෙස්ත්‍රාත් අධිකරණයෙන් ඉල්ලා සිටියා. අපරාධ පරීක්ෂණ දෙපාර්තමේන්තුවේ වාණිජ අපරාධ අංශයේ ප්‍රධාන පොලිස් පරීක්ෂක කරුණාතිලක මහතා විසින් මෙම ඉල්ලීම සිදු කරනු ලැබුවා. එහිදී කරුණු දක්වමින් ඒ මහතා කියා සිටියේ, එකම සිදුවීමක් සම්බන්ධයෙන් නඩු විභාග දෙකක් පවත්වා දඬුවම් නියම කිරීම නුසුදුසු බවයි. මේ වන විටත් මෙම සිද්ධිය සම්බන්ධයෙන් පුළුල් විමර්ශන පවත්වා නඩු පවරා ඇති බැවින් බන්ධනාගාර අධිකරණය මඟින් වෙනම නඩුවක් විභාග කිරීම අවශ්‍ය නොවන බව පෙන්වා දුන් ප්‍රධාන පොලිස් පරීක්ෂකවරයා, ඉදිරි දිනකදී නීතිපති දෙපාර්තමේන්තුව ද මේ සම්බන්ධයෙන් කරුණු දැක්වීමට නියමිත බව සඳහන් කළා. මේ පිළිබඳ කරුණු සලකා බැලූ මීගමුව ප්‍රධාන මහෙස්ත්‍රාත් ශිලනි පෙරේරා මහත්මිය ප්‍රකාශ කළේ, බන්ධනාගාර පනතට අනුව බන්ධනාගාර බලධාරීන්ට එවැනි නඩු විභාගයක් පැවැත්වීමට නීතිමය බලය හිමිව ඇති බැවින්, ඒ පිළිබඳව සොයා බලා ඉදිරි දිනකදී සුදුසු නියෝගයක් ලබා දෙන බවයි. මෙහිදී කරුණාතිලක මහතා අධිකරණයෙන් ඉල්ලා සිටියේ බන්ධනාගාරයට සිදුවී ඇති හානිය නිවැරදිව තක්සේරු කිරීම සඳහා මිනින්දෝරු දෙපාර්තමේන්තුව ලවා අපරාධ ස්ථානයේ ඩ්‍රෝන පරීක්ෂණයක් සිදු කිරීමට නියෝගයක් නිකුත් කරන ලෙසයි. ඒ අනුව, පොලිසිය ඉල්ලා සිටි සියලුම නියෝග නිකුත් කිරීමට මහෙස්ත්‍රාත්වරිය පියවර ගත්තා. ඉකුත් 5 සහ 6 යන දිනවල මීගමුව බන්ධනාගාරය තුළ ඇති වූ මෙම දරුණු ගැටුම සම්බන්ධයෙන් අපරාධ පරීක්ෂණ දෙපාර්තමේන්තුවේ වාණිජ අපරාධ අංශයේ සහකාර පොලිස් පරීක්ෂක කළුආරච්චි මහතා ඇතුළු නිලධාරීන් පිරිසක් වැඩිදුර වාර්තාවක් මඟින් අධිකරණයට කරුණු ඉදිරිපත් කර තිබුණා. මෙම ගැටුමෙන් මියගිය සංජු දිල්රුක්ෂාන් නමැති අයගේ මරණ පරීක්ෂණයට අදාළ සාක්ෂි කැඳවීම පසුගිය 11 වන දින මාලිගාකන්ද අධිකරණයේදී පවත්වා ඇති අතර, එහිදී මියගිය අයගේ සිරුරෙන් සොයාගත් උණ්ඩ කොටසක් මෙන්ම ඔහුගේ ඇඳුම් සහ ලේ සාම්පල නඩු භාණ්ඩ ලෙස ඉදිරිපත් කර තිබෙනවා. එම නඩු භාණ්ඩ නිසි පරිදි නඩු භාණ්ඩ කාමරයේ තැන්පත් කරන ලෙස එහිදී මහෙස්ත්‍රාත්වරිය නියෝග කළා. මීට අමතරව මීට පෙර ලබා දුන් නියෝගයකට අනුව මෙම සිද්ධියෙන් ජීවිතක්ෂයට පත් වූ සම්පත් පුෂ්පකුමාර, හර්ෂ ප්‍රියංකර සහ දනිඳු හෂ්මික යන අයගේද මරණ පරීක්ෂණවල සාක්ෂි කැඳවීම මෙහිදී සිදු කෙරුණු අතර සාක්ෂි දීම සඳහා මියගිය අයගේ ඥාතීන් වන සුරංජි ප්‍රනාන්දු, නිරුපා රෝෂානි, මනෝජ් ප්‍රියංගික, නිමාලි ශිරන්ති සහ ජයලත් පෙරේරා යන අය පෙනී සිටියා. මේ වන විට නිලධාරීන් ඇතුළු පුද්ගලයන් 287 දෙනෙකුගෙන් ප්‍රකාශ සටහන් කරගෙන ඇති බව අපරාධ පරීක්ෂණ දෙපාර්තමේන්තුව ඉකුත් 14 වනදා අධිකරණය හමුවේ ප්‍රකාශ කර තිබුණා. එහිදී එම නිලධාරීන් සඳහන් කළේ මෙම සිද්ධිය සම්බන්ධයෙන් අනාවරණය කරගන්නා සියලුම සැකකරුවන්ට එරෙහිව මිනීමැරුම් චෝදනා මෙන්ම ගිනිඅවි ආඥා පනත සහ පොදු දේපළ පනත යටතේ නඩු පැවරීමට කටයුතු කරන බවයි. ඒ අනුව දණ්ඩ නීති සංග්‍රහයේ වගන්ති රැසක් යටතේ වැරදි සිදුවී ඇති බව අපරාධ පරීක්ෂණ දෙපාර්තමේන්තුව වැඩිදුරටත් කියා සිටියා. ඉදිරිපත් වූ සියලු කරුණු සලකා බැලීමෙන් අනතුරුව මෙම විමර්ශනවල ප්‍රගති වාර්තාව එළඹෙන 23 වැනිදා අධිකරණයට ඉදිරිපත් කරන ලෙස මහෙස්ත්‍රාත්වරිය නියෝග කළා. එමෙන්ම ජාතික රෝහලේදී මියගිය රැඳවියා සහ නිලධාරීන් දෙදෙනා ඇතුළු මෙතෙක් සාක්ෂි කැඳවීම් සිදු කර නොමැති මරණවලට අදාළව සාක්ෂි කැඳවීමට කටයුතු සූදානම් කරන ලෙසද අපරාධ පරීක්ෂණ දෙපාර්තමේන්තුවට නියෝග කෙරුණා. බන්ධනාගාරය වෙනුවෙන් පෙනී සිටි සැරයන් මුදිත රොහාන් මහතා සියලුම රැඳවියන්ගේ වෛද්‍ය වාර්තා ලබා ගැනීමට නියෝගයක් නිකුත් කරන ලෙස මෙහිදී ඉල්ලා සිටි අතර ප්‍රධාන මහෙස්ත්‍රාත්වරිය පෙන්වා දුන්නේ එම නියෝගය ඉකුත් 9 වන දින දැනටමත් නිකුත් කර ඇති බවයි. වෙනත් බන්ධනාගාර වෙත මාරු කර යවන ලද රැඳවියන් පිළිබඳ සම්පූර්ණ වාර්තාවක් ඉදිරිපත් කරන ලෙසද බන්ධනාගාර බලධාරීන්ට නියෝග කෙරුණු අතර, ඒ පිළිබඳව සංඛ්‍යාත්මක වාර්තාවක් දැනටමත් ඉදිරිපත් කර ඇති බැවින් සවිස්තරාත්මක වාර්තාව ඉදිරි දිනයකදී ලබා දෙන බව බන්ධනාගාරය වෙනුවෙන් පෙනී සිටි නිලධාරීන් අධිකරණයට ප්‍රකාශ කළා.